cheharo.n kii dhuup aa.Nkho.n kii geharaa_ii le gayaa

cheharo.n kii dhuup aa.Nkho.n kii geharaa_ii le gayaa

cheharo.n kii dhuup aa.Nkho.n kii geharaa_ii le gayaa
aa_iinaa saare shahar kii biinaa_ii le gayaa

Dube huye jahaaz pe kyaa tabsaraa kare.n
ye haadasaa to soch kii geharaa_ii le gayaa

haalaa.Nki bezubaan thaa lekin ajiib thaa
jo shaKhs mujh se chhiin ke goyaa_ii le gayaa

is vaqt to mai.n ghar se nikalane na paa_uu.Ngaa
bas ek kamiiz thii jo meraa bhaa_ii le gayaa

jhuuTe qasiide likhe gaye us kii shaan me.n
jo motiyo.n se chhiin ke sachchaa_ii le gayaa

yaado.n kii ek bhii.D mere saath chho.D kar
kyaa jaane vo kahaa.N merii tanhaa_ii le gayaa

ab asad tumhaare liye kuchh nahii.n rahaa
galiyo.n ke saare sang to saudaa_ii le gayaa

ab to Khud apanii saa.Nse.n bhii lagatii hai.n bojh sii
umro.n kaa dev saarii tavanaa_ii le gayaa

aa.Nkh pyaasii hai ko_ii manzar de

aa.Nkh pyaasii hai ko_ii manzar de

aa.Nkh pyaasii hai ko_ii manzar de
is jaziire ko bhii samandar de

apanaa cheharaa talaash karanaa hai
gar nahii.n aa_inaa to patthar de

band kaliyo.n ko chaahiye shabanam 
in chiraaGo.n me.n roshanii bhar de

pattharo.n ke saro.n se karz utaar
is sadii ko ko_ii payambar de

kah_kaho.n me.n guzar rahii hai hayaat
ab kisii din udaas bhii kar de

phir na kahanaa ke Khud_Khushii hai gunaah
aaj fursat hai faisalaa kar de

yuu.N sajaa chaa.Nd ki jhalakaa tere a.ndaaz kaa rang

yuu.N sajaa chaa.Nd ki jhalakaa tere a.ndaaz kaa rang
Faiz Ahmed Faiz


yuu.N sajaa chaa.Nd ki jhalakaa tere a.ndaaz kaa rang
yuu.N fazaa mahakii ki badalaa mere hamaraaz kaa rang
saayaa-e-chashm me.n hairaa.N ruKh-e-raushan kaa jamaal
surKhii-e-lab pe pareshaa.N terii aavaaz kaa rang
bepiye ho.n ki agar lutf karo aaKhir-e-shab
shiishaa-e-may me.n Dhale subah ke aaGaaz kaa rang
cha.ngo-nay rang pe the apane lahuu ke dam se
dil ne lay badalii to madham huaa har saaz kaa rang
[cha.ng= a type of musical instrument; nay=flute]
ik suKhan aur ki phir rang-e-takallum teraa
harf-e-saadaa ko inaayat kare ejaaz kaa rang
[takallum=conversation; ejaaz=miracle]